Leit að pilti í Reykjavík

Leit hefur staðið yfir síðan kl. 21.00 á nýársdag að 19 ára gömlum pilti sem skilaði sér ekki heim af dansleik á Broadway.

Um 100 björgunarsveitarmenn hafa leitað piltsins í nótt, þar af þrír bílar og um 15 leitarmenn frá Flugbjörgunarsveitinni. Leitin er nú komin í aðra lotu og kom nýr mannskapur í birtingu í dag.

Seinast er vitað um ferðir Jakobs Hrafns Höskuldssonar um kl. 5:30 að morgni nýársdags við Broadway í Ármúla. Jakob er 188 cm á hæð, stuttklipptur, grannvaxinn og var klæddur í dökkar buxur, svarta hettupeysu og með svarta derhúfu. Þeir sem telja sig hafa orðið varir við ferðir Jakobs eru hvattir til að hafa samband við lögregluna í síma 444-1000.

Óveðursútkall

Um klukkan 2 í nótt var pípt út F3-Grænn á Höfuðborgarsvæðinu vegna lægðar sem var að ganga yfir.  Verkefni höfðu verið að berast síðan um miðnætti en viðbúið var að veðrið færi versnandi og því allar sveitir settar í viðbragðsstöðu.  Rúmum hálftíma síðar var svo heildarútkall á höfuðborgarsvæðinu og sendur allar sveitir út menn.  Rétt eftir fimm var svo síðustu verkefnum lokið. 

Peppfundur

Peppfundurinn verður haldinn annaðkvöld, fimmtudagskvöldið 13. desember!!

Hvetjum alla félaga sem og nýliða til að mæta niðrí sveit og koma sér í gírinn fyrir söluvertíðina sem er framundan.

Við byrjum kl. 20.00 – pizzur og fleira góðgæti í boði. Vonumst til að sjá sem flesta!

Óveðursútkall

Að kvöldi mánudagsins 10. desember var sveitin kölluð út vegna óveðurs í Reykjavík.  Tveir bílar fóru úr húsi ásamt áhöfn og voru að frammá nótt.  Mikill fjöldi útkalla var í borginni og í nógu að snúast fyrir sveitirnar á svæðinu en yfir 50 manns voru í verkefnum á hverjum tíma.

Starfsmaður flugeldanefndar

Flugeldanefnd Flugbjörgunarsveitarinnar í Reykjavík auglýsir, lausa til umsóknar, stöðu starfsmanns nefndarinnar.

Í starfinu felst umsjón með flugeldavertíðinni sem framundan er, undir stjórn Flugeldanefndar. Um er að ræða markaðssetningu, öflun tilskilinna leyfa, gerð samninga og margt fleira.

Reynsla á sviði rekstrar og/eða markaðsmála er æskileg en þó ekki skilyrði.

Laun eru skv. samkomulagi, mögulega árangurstengd.

Áhugasamir hafi samband.

Fyrir hönd Flugeldanefndar

Vilberg Sigurjónsson
GSM: 696-3305
e-mail: [email protected]

 

Dagskrá vikunnar, Hellweekend

Dagskrá vikunnar er þéttskipuð að vanda.  Í kvöld, þriðjudaginn 20.11. klukkan 20 verður fyrirlesturinn Björgunarmaður í Aðgerðum haldin í húsnæði Landsbjargar í Skógarhlíð.  Það er hann Jónas okkar Guðmundsson sem sér um fræðsluna en einkum er stílað inná B1 og B2. 

Þá ætla fjallabjörgunarsinnaðir félagar að hittast og fara yfir fræðin á bakvið kerfin.  Upplagt fyrir þá sem ekki hafa kynnt sér þetta áður að kíkja og sjá hvaða hugsun er á bakvið aðgerðirnar og uppsetningu kerfanna.
Miðvikudaginn 21.11 verður samæfing undanfarahópa á Höfuðborgarsvæðinu en lýsingin að þessu sinni er "Vatnasull".
Fimmtudaginn 22.11 klukkan 18:15 er æfing að venju.  Byrjum á að hlaupa í ca. 40 mínutur og tökum svo ýmsar æfingar í hálftíma í viðbót.  Allt undir styrkri stjórn Egils en við viljum endilega hvetja alla félaga til að mæta og njóta stemmningarinnar.
Föstudaginn 23.11 klukkan 18:00 byrjar svo Hellweekend hjá B2 en B1 fer í göngu á Hengilsvæðinu klukkan 19.  Talsverður fjöldi félaga hefur boðið sig fram í umsjón Hellweekend en eins og allir félagar þekkja þá er þetta hápunktur þjálfunarinnar og mjög gaman að taka þátt í því með nýliðunum.

Ráðstefna um aðgerða- og fjarskiptamál

Sunnudaginn 25. nóvember verður haldin ráðstefna um aðgerða- og fjarskiptamál í húsnæði Hjálparsveitar skáta Reykjavík að Malarhöfða. Ráðstefnan er á vegum Slysavarnarfélagsins Landsbjargar

Skráning á ráðstefnu um aðgerða- og fjarskiptamál er hjá skrifstofu Slysavarnarfélagsins Landsbjargar í síma 570-5900 eða á netfangið [email protected].

Ráðstefnan mun taka á nýjungum á þessum sviðum en mikil framþróun hefur verið undanfarin misseri, bæði með tilkomu endurskoðaðra reglna um aðgerðastjórnir og tilkomu TETRA kerfisins en milli þrjú og fjögurhundruð TETRA stöðvar eru komnar í notkun hjá björgunarsveitum.

-Kynning á reglum um aðgerðastjórnir
-Framtíðin í aðgerðastjórnun
-TETRA sem aðgerðastjórnunartæki. möguleikar og nýjungar
-Ferilvöktun TETRA/ Site Watch. Sagt frá og kynnt nýtt forrit fyrir sveitir og svæðisstjórnir

Fjallabjörgunaræfing um helgina og Kassapartý

Núna á laugardaginn stendur Fjallahópur fyrir æfingu í fjallabjörgun.  Lagt verður af stað úr húsi klukkan 9 og haldið í Búhamra þar sem spottast verður framm eftir degi.

Allir sem hafa áhuga á fjallabjörgun eru velkomnir með, alls ekki bara þeir sem hafa áður æft kerfin.  Séu einhverjar spurningar má hringja í Dodda í síma 694 1198.

Um kvöldið verður svo Kassapartý í Sjálfstæðissalnum á Seltjarnarnesi og hefst gamanið kl 20.
Fyrir ykkur sem ekki þekkið þessa áralöngu hefð okkar (hóst nýliðar hóst)  þá  er hún sú að fyrir hvert nýtt fallhlífastökk sem stokkið er skuldar viðkomandi stökkvari kassa af ?kók í gleri? !

Fyrir þá sem ekki fara á æfinguna viljum við eindregið hvetja menn til að mæta niður í sveit eftir klukkan 10 á laugardag í hið sígilda laugardagskaffi.  Ungir sem aldnir, langir og stuttir, allir velkomnir.

Afmæli Magnúsar Hallgrímssonar

Hann Magnús okkar Hallgríms átti 75 ára afmæli 6. nóv síðastliðinn og ætlar að bjóða til veislu núna um helgina.  Magnús hefur verið virkur félagi í sveitinni í fjöldamörg ár en yngri félagar muna sennilega best eftir honum sem Magga í Miðskálanum frá smíðaferðunum í Tindfjöllum, meistara í bruggun fjallates og höfðingi heim að sækja.

Veislan verður í félagsheimili Háteigskirkju 17. nóvember klukkan 20:00

Þeir sem vilja óska honum til lukku með daginn geta haft samband í síma 898 6659 og meldað sig við hann.

155 ára afmæli

Hlíf Ólafsdóttir lífeindafræðingur verður áttræð þann 23 nóvember næstkomandi.  Maður hennar, Magnús Hallgrímsson verkfræðingur, varð 75 ára fyrr í mánuðinum.  Þau hjónin munu taka á móti gestum í safnaðarheimili Háteigskirkju laugardaginn 17. nóvember milli kl. 20 og 23.  Þau vonast eftir að sjá sem flesta af vinum og ættingjum.