Flugbjörgunarsveitin Reykjavík óskar ykkur öllum gleðilegs nýs árs og þökkum við innilega fyrir stuðninginn á fyrri árum!
Nýliðastarfið fór af stað á ný eftir mikla fjáraflanavertíð í desember en FBSR heldur úti jólatrjáasölu og flugeldasölu yfir desember mánuð. Það er með ólíkindum að sjá tvö slík stór verkefni verða að veruleika ár eftir ár við uppsetningu sölustaða flugelda strax eftir tiltekt á jólatrjáasölunni.
Fyrsta mál á dagskrá um nýliðna helgi var Snjóflóð 1 og 2 þar sem báðir nýliðahóparnir okkar æfðu réttu handtökin í leit í snjóflóði og eins að kunna að lesa vel í aðstæður, en öryggi björgunarmanns er alltaf númer 1, 2 og 3.
Meðfylgjandi mynd er af hópnum ásamt frábærum leiðbeinendum.
Flugbjörgunarsveitin þakkar öllum þeim sem keyptu jólatré kærlega fyrir stuðninginn.
Jólatrjáasala Flugbjörgunarsveitarinnar Reykjavík (FBSR) var opin frá 2. desember fram að jólum í vefverslun, á Flugvallarvegi 7 við Öskjuhlíð og við Byko Breidd.
Opnunartímar á Flugvallarvegi 7 voru:
Helgar kl. 10-22
Virkir dagar kl. 12-22
Opnunartímar við Byko Breidd voru:
Helgar kl. 10-18
Virkir dagar kl. 12-19
Hægt er að kaupa vörur í vefverslun Flugbjörgunarsveitarinnar og sækja þær á Flugvallarveg 7 eða fá heimsent í Reykjavík, á Seltjarnarnes og í Kópavogi gegn vægu gjaldi.
Í jólatréssölu Flugbjörgunarsveitarinnar er boðið upp á nordmannsþin (normannsþin), stafafuru, blágreni og rauðgreni. Nordmannsþinurinn kemur frá Danmörku en íslensku jólatrén, þ.e. grenið og furan, koma frá Skógræktarfélagi Íslands.
Að auki er boðið upp á greinar, jólatrésfætur, pallafuru og kerti.
Hægt er að fá frekari upplýsingar í síma 551 2300 eða á facebook síðu FBSR.
Á höfuðborgarsvæðinu er einnig hægt að kaupa jólatré hjá Hjálparsveit skáta Garðabæ og Björgunarsveit Hafnarfjarðar. Víða um land eru björgunarsveitir Slysavarnarfélagsins Landsbjargar að selja jólatré.
Flugbjörgunarsveitin þakkar öllum þeim sem keyptu jólatré kærlega fyrir stuðninginn.
Leiðbeiningar um meðhöndlun jólatrjáa
Normannsþinur er allur innfluttur frá Danmörku, þar sem hann er ræktaður til að vera jólatré. Hann er afar barrheldinn og heldur barri og lit þótt ekki sé vatn í jólatrésfætinum.
Stafafura vex á Íslandi og vinnur sífellt á. Furan heldur barrinu, hvað sem á dynur, út öll jólin og jafnvel lengur. Það er ágætt að setja vatn í fótinn en er ekki bráðnauðsynlegt, hún þornar bara fallega. Stafafuran angar langar leiðir og fyllir húsið jólailmi.
Umhirða þar til tré er sett í fót. Best er að geyma trén í netinu á skjólgóðum stað utanhúss og oftast borgar sig að spúla þau nokkrum sinnum með kröftugri vatnsbunu úr garðslöngunni, einkum ef frostvindur er og líka svo sem tveimur tímum áður en þau eru tekin inn, þá sígur vel af þeim og þau koma frísk og hress í hús. Ef frost er úti þegar það stendur til, er ráðlegast að láta þau þiðna hægt, t.d. í frostlausum bílskúr. Ef tréð er frosið má einnig leggja það í kalt vatn í baðkeri eða láta vatn renna á það. Auðveldara er að setja tréð í jólatrésfótinn ef það er enn í netinu meðan verið er að festa það.
Tré sett í fót. Gott er að saga aðeins, smá á ská, neðan af trénu áður en það er sett í jólatrésfótinn og hella svo sjóðandi heitu vatni ofan í fótinn. Þannig opnast æðarnar í trénu og dásamlegur greniilmur berst um allt. Eftir það er ráðlegt að fylla á með köldu eða volgu vatni þannig að alltaf sé nóg vatn í fætinum. Tréð drekkur mest fyrstu dagana og þá þarf að fylgjast með að nóg vatn sé í fætinum. Aldrei má vanta vatn í fótinn því þá lokast vatnsæðar trésins aftur.
Á laugardaginn síðastliðinn fór fram umfangsmikil flugslysaæfing þar sem félagar frá FBSR tóku þátt og nýliðar okkar einnig, bæði sem björgunarfólk og sem leikarar. Æfingin er mikilvægur þáttur þess að æfa samhæfingu og viðbragðsáætlanir á milli fjölmargra viðbragðsaðila. Þátttakendur voru allt frá starfsmönnum ISAVIA til lögreglu, sjúkraflutningamanna, björgunarfólks, slökkviliðs og margra annarra viðbragðsaðila.
Ljósmyndir: Inga Hrönn, Arianne Gäwiler, Bergþór Jónsson.
Dagana 30. október til 3. nóvember fer fram sala á Neyðarkallinum og líkt og síðustu ár verðum við í Flugbjörgunarsveitinni Reykjavík á hinum ýmsu sölustöðum.
Sala á Neyðarkallinum er ein stærsta fjáröflun sveitarinnar og gríðarlega mikilvægur hlekkur í því að halda úti björgunarsveit og gera okkur kleift að þjálfa nýja og eldri félaga, viðhalda tækjum og margt fleira.
Við vonum innilega að þið takið vel á móti félögum okkar sem verða m.a. hér og þar í Kringlunni, Mjóddinni, í Garðheimum, Austurveri og Bónus í Norðlingaholti.
Eins bendum við fyrirtækjum og öðrum áhugasömum á að hægt er að kaupa stóran Neyðarkall af sveitinni. Hafið samband á [email protected] fyrir frekari upplýsingar.
Við hlökkum til að taka á móti ykkur með bros á vör næstu daga!
Nýliðar í B2 tóku námskeið í félagabjörgun sl. helgi og fóru æfingar meðal annars fram á Sólheimajökli. Á meðan voru nýliðar í B2 í fyrstu hjálp 1 en námskeiðið fór fram í Reykjavík. Bæði námskeið heppnuðust vel en svo að svona stór námskeiðshelgi gangi upp þurfa margir að koma að verki.
Við hjá FBSR erum heppin að eiga reynslumikið fólk að á mörgum sviðum, líkt og sást um helgina, og færum við okkar félögum sem leiðbeindu og kenndu okkar bestu þakkir fyrir. Einnig þökkum við þeim fjölmörgu sem tóku að sér það mikilvæga verk að leika sjúklinga á sjúkraæfingunum.
Ljósmyndir: Arianne Gäwiler, Ingvi Stígsson og Inga Hrönn.
Það var heldur betur nóg um að vera hjá FBSR um nýliðna helgi.
Nýliðar í B1 fóru í æfingaferð í Tindfjöll og gistu þar 2 nætur í tjaldbúðum. Yfir helgina var áhersla á rötun þar sem helsta vopnið var hið klassíska par: Kort og áttaviti! Nýliðarnir fengu þó góðan undirbúning fyrir helgina þar sem farið var yfir grunnatriði í rötun, útreikninga á staðsetningu og hnit og veðurspáin stúderuð enda Tindfjöll ekki þekkt fyrir veðursæld. Þrátt fyrir nístingskulda lék veðrið vel við Tindfjallagesti.
Nýliðar í B2 þreyttu námskeið í Óveðri og björgun verðmæta. Þau fengu kjöraðstæður til æfinga enda langöruggast að æfa slíkt í blíðskaparveðri. Á sunnudeginum var svo slegið til sveitaræfingar með inngengnum og B2 þar sem áhersla var lögð á leitartækni ásamt bland í poka af fyrstu hjálp og fleiri nytsamlegum æfingum.
Ljósmyndir: Samúel Þór Hjaltalín, Snædís Perla Sigurðardóttir, Ingvi Stígsson og Þórður Björn Sigurðsson.
Í dag, sunnudaginn 29. september, var haldinn fjölskyldudagur fyrir félaga FBSR og aðstandendur þeirra. Börnin gátu komið með slasaða eða veika bangsa til aðhlynningar, klifið var í klettum, farið í hina ýmsu leiki, grillaðar pylsur og margt fleira. Veðrið lék við okkur í dag og má með sanni segja að fjölskyldudagarnir séu orðnir ein skemmtilegasta hefðin innan sveitarinnar. Við þökkum öllum þeim sem komu að skipulagi og aðstoðuðu við að gera daginn ógleymanlegan fyrir félaga og fjölskyldur þeirra.
Nú er haustið komið með sínum gulu og appelsínugulu viðvörunum⚠️ og það þýðir: Nýliðaþjálfun FBSR er hafin á ný! Nýliðahóparnir okkar, B1 og B2, héldu af stað í sína fyrstu æfingaferð þetta haustið um liðna helgi ásamt þjálfurum þar sem m.a. var farið yfir ferðamennsku og rötun. Nýliðarnir fengu kjöraðstæður til æfinga fyrir þessi mikilvægu atriði 🙌
Ljósmyndir: Ásta Ægisdóttir og Þorsteinn Ásgrímsson Melén.
