Sérhæfðir
leitarhópar voru kallaðir út í dag til að leita að dreng sem ekki hafði
skilað sér eftir skólasund. Um fimmtíu manns á svæði eitt
(höfuðborgarsvæðinu) tóku þátt í leitinni og þ.á.m einn bíll með sex
leitarmönnum frá Flugbjörgunarsveitinni. Ekki hafði leit staðið yfir í
langan tíma þegar viðkomandi kom fram heill á húfi.

Snjótroðara bjargað af Langjökli 

Fimmtudaginn fimmta janúar 2006 festist snjótroðari í krapapytti í
jökulrönd Langjökuls, skammt frá Jaka.  Beðið var um aðstoð við að losa hann og koma honum niður. Farið var á laugardeginum.

Magnús Þór og Guðgeir fóru með
snjóbílinn og Maggi Andrésar, Jón Sigfús, Danni og Halldór Magg fóru á
FBSR 4. Farið var úr bænum kl. 6:30 og keyrt upp að Jaka. Mikið hafði
snjóað sólarhringinn áður og stóð rétt svo pústið á snjótroðaranum upp
úr snjónum þegar að honum var komið. Seinna meir kom annar snjótroðari
á svæðið frá Heiðari í Varmahlíð. Snjóbíllinn og troðarinn sáu um að
ýta mesta snjónum frá, að ógleymdum ófáum skóflutökum hjá okkur og
mönnum frá Fjallamönnum hf.

Þegar búið var að moka vel frá bílnum sá átta hjóla MAN trukkur á
50" dekkjum frá Activity Group um að kippa í troðarann og losnaði hann
um tvö leytið. Eftir vel heppnaða björgun á troðaranum var tekinn smá
rúntur á FBSR 4 upp á hábungu Langjökuls.

Myndir og texti: Magnús Andrésson

Svona var aðkoman að troðaranum

Björgunarsveitarfólk hjá
Sirrý

21. desember 2005

Flugbjörgunarsveitinni hlaust sá heiður að vera í lokaþætti hinna vinsælu þáttaraðar Fólk með Sirrý, sem hefur gengið sleitulaust á Skjá einum um árabil. Tuttugu fulltrúar frá okkur mættu í sjónvarpssal til að spjalla við Sirrý, auk um tuttugu annarra gesta.

Spjallið snerist aðallega um hvernig það er að vera í björgunarsveit, við hverju megi búast í starfinu og af hverju fólk fórnar frítíma sínum í sjálfboðaliðastarf í almannaþágu. Eyrún Pétursdóttir og Jónas Guðmundsson sátu í sófanum hjá Sirrý og einnig talaði hún við fólk úti í sal. Jónas og Eyrún mættu svo með þrjá Troðna flugeldapakka. Nöfn viðstaddra gesta voru dregin úr potti og þau heppnu fengu fjölskyldupakkana að gjöf. Sirrý var sjálf með veglega gjöf sem var líka dregin út og það var enginn annar en Jón okkar Svavars sem var svo heppinn að fá þennan líka flotta dekurpakka frá Bláa lóninu með boddí lósjón og allt. Að auki fengu allir viðstaddir gestir miða í Bláa lónið.

Þetta var stórgaman, en við skulum ekki hafa fleiri orð um það heldur láta myndirnar tala sínu máli. Það var hinn heppni og hæfileikaríki félagi okkar Jón Svavarsson sem tók þessar myndir.

Skoða má þáttinn á vef Skjás eins með því að smella hér

Eyrún í förðun

Jónas og Addý ræða málin

Föngulegur flubbahópur af öllum kynslóðum var í salnum

Þá var komið að happdrættinu. Í vinning var auðvitað flugeldapakki

Ekki laust við að það sé nokkur svipur með þeim Addý og Sirrý

Í gær og í dag var ákaft leitað að 18 ára pilti sem saknað var. Í gær
var óskað eftir sérhæfðum leitarhópum og var leit haldið áfram í morgun
í birtingu. Pilturinn fannst svo látinn um hádegisbil við Nauthólsvík.

Í gær óskaði Svæðisstjórn eftir aðstoð sérhæfðra leitarhópa til að
vinna úr vísbendingum og fór fjögurra manna hópur frá okkur af stað
mjög fljótlega til að hraðleita á líklegum stöðum í Öskjuhlíð, og leita
frekari vísbendinga fyrir myrkur. Bátaflokkar og kafara leituðu á meðan
á sjó. Þegar myrkvaði var svæðinu í Öskjuhlíð og næsta nágrenni skipt
upp í svæði sem voru fínkembd með leitarljósum. Þegar búið var að
fínkemba svæðin, án árangurs, var leit frestað fram til morguns.

Í birtingu í morgun voru svo sömu svæði leituð aftur auk þess sem
fjörur voru gengnar á stærra svæði, kafar og bátar leituð á og í sjó og
þyrla Landhelgisgæslunnar leitaði úr lofti.

Það var þyrla Landhelgisgæslunnar sem fann piltinn í Nauthólsvík um hádegisleytið og var hann þá látinn.

Flugbjörgunarsveitin vill votta aðstandendum og fjölskyldu drengsins samúð sína.

Meðfylgjandi mynd er tekin af leitarhópnum á æfingu. 

Rétt fyrir klukkan þrjú í gær barst útkall vegna neyðarástands í
farþegaþotu á flugi yfir Atlantshafi. Um borð voru 281 farþegi og
áætlaður lendingartími kl. 15:56. Björgunarsveitir voru settar í
viðbragðsstöðu samkvæmt viðbragðsáætlun.

Um var að ræða tveggja hreyfla Airbus þotu frá Air Canada sem var á
leið frá Þýskalandi til Kanada. Slokknað hafði á öðrum hreyflinum og
bað flugstjórinn um nauðlendingu í Keflavík. Lendingin tókst
giftusamlega og engan farþega skaðaði.

Meðfylgjandi mynd er tekin á æfingu á viðbragðsáætlun fyrir
Keflavíkurflugvöll í nóvember í fyrra og sýnir neyðarbíla í
viðbragðsstöðu.

Ísklifur í Gígjökli 12. nóvember 2005 

Það voru sjö sprækir sem lögðu af stað kl. rúmlega átta á laugardagsmorgun í dagsferðina sem var á dagskránni (ásamt árshátíð). Það var mikið rætt um atburði undangenginna daga og sitt sýndist hverjum. Engar niðurstöður fengust í málin en menn voru staðráðnir í að skemmta sér vel í ísnum.

Aðstæður voru góðar og við gátum stytt okkur leið með því að ganga langsum eftir ísilögðu lóninu. Stöku sinnum mátti heyra háværa smelli þegar það losnaði um spennu í ísnum og þegar þessi smellir voru orðnir nokkuð reglulegir var ákveðið að smella mannskapnum í línu. Klakklaust komumst við þó að jöklinum og ekki var uppgangan erfið á jökulsporðinn.

Við þurftum ekki að leita lengi að góðum aðstæðum til ísklifurs þar sem við undum okkur glaðir fram eftir degi. Á leiðinni til baka yfir lónið losuðum við um dágóðan ísmola sem við burðuðumst með að bílnum. Hann tókum við með okkur í bæinn þar sem hann endaði ævi sína í margskonar drykkjum sem glaðir flubbar skoluðu niður í lítravís í mögnuðu partýi heima hjá Dodda.

– Matti Zig.

Frá vinstri: Eðvarð, Stefán, Atli, Viðar, Hjörtur og Doddi. Matti er á bak við
myndavélina.

Doddi með flotta takta

Atli og Stefán Þór

Ísmolinn góði

Slysaæfing 1. nóvember 2005

– "Flags of Our Fathers" 

Sjúkrahópur Flugbjörgunarsveitarinnar stóð fyrir slysaæfingu sem haldin var á mánudagskvöldi í bílflökum í Hafnarfirði.

Æfingin var að þessu sinni nokkuð raunverulegri en áður þar sem við nutum þess að Áslaug Dröfn Sigurðardóttir farðaði sjúklingana af stakri snilld. Hún hefur góða reynslu af slysaförðun og farðaði meðal annars særða "hermenn" fyrir kvikmyndina Flags of Our Fathers sem Clint Eastwood leikstýrði hér á landi fyrir skemmstu. Sá sem þetta skrifar fékk þann heiður að fylgjast með henni breyta venjulegu fólki í það sem líktist helst hrekkjavökuskrímslum á svipstundu.

Vettvangurinn var hópslys, árekstur rútu og fólksbíls. Æfingin gekk vel, þó svo auðvitað hefði sumt smálegt mátt betur fara, en æfingar eru einmitt til þess að slípa þá hluti til. Þrátt fyrir að sjúklingar væru frekar margir tókst að halda þeim öllum í stabílu ástandi og koma í flutning tiltölulega fljótt.

Sjúkrahópur vill koma á framfæri þökkum til þeirra sem tóku þátt.

Adela gerð þrútin í andliti með farða. Seinna var sárum bætt við

Brunasár er gert á fingrunum með því að setja þunna latex húð á þá. Latexhúðin
er förðuð og síðan rifin upp til að mynda fleiður

Áslaug makar gerviblóði í sár á öxl Bubba

Þessi er nokkuð hvítur í andliti, en það er nú kannski eðlilegt að menn
fölni pínulítið við að missa fótinn

Það kitlar að fá kalt gerviblóð á magann

Útkoman verður að teljast frekar gorug. Svona á þetta að vera!

Inga Rós dekkir gerviblóð með því að blanda skyndikaffi saman við það

Komið á vettvang. Guðgeir hópstjóri talar við "fulltrúa svæðisstjórnar" Ingu
Rós. Matti og Ásgeir fylgjast með.

Hópstjóri "brífar" hópinn og úthlutar verkefnum

Hlúð að sjúklingi á söfnunarsvæði slasaðra (SSL)

Nýliðar í B1 fóru í Tindfjöll í verklega kennslu í notkun á landakorti og
áttavita. Eins og venjulega var lagt af stað uppúr kl. 19:00 og stefnan
tekin á Hlíðarenda þar sem allur skarinn "pulsaði sig upp" fyrir átök
helgarinar.

Óvæntur glaðningur

Við vorum komin að Fljótdsal, innsta bænum í Fljótshlíð, um  kl. 22 og lögðum
strax af stað gangandi upp hlíðina. Þegar við komum upp fyrir Sneiðinginn var hópnum skipt í minn einingar og átti hver eining að miða sig út. Þetta gekk sæmilega þar sem tunglbjart var með ágætum. Þegar í skálann var komið var klukka orðin 00:26 og höfðum við verið tvo og hálfan tíma á leiðinni. Fyrr um daginn höfðu fjórir inngengnir félagar farið úr bænum og keypt steinolíu og því var skálinn ansi hlýlegur þegar við komum í hann. Kunna nillarnir og þeir sem um æfinguna sáu, þeim Guðgeiri, Halldóri, Einari Hjö, Steinari og Danna, en hann sá um akstur báða dagana, bestu þakkir fyrir það og einnig fyrir hjálpina um helgina.

Laugardagurinn var svo hefðbundinn framan af. Fólk naut útiverunnar og lærði eflaust heilmikið um rötun. Um kvöldið var svo hin hefðbundna veisla þar sem allir gæddu sér á bökuðum baunum og pylsum. Þegar maður hélt að tími væri komin að koma sér í poka drógu nillarnir upp þrjár súkkulaðitertur og skreyttu með kertum, blésu upp blöðrur og sungu afmælissönginn fyrir flokkstjórann sinn Stefán, en hann varð 25 ára þennan dag. Allir voru saddir og sælir þegar í pokana var komið.

Neyðarsól á lofti

Klukka 02:00 hafði lögreglan á Hvolsvelli samband við stjórnendur ferðarinnar og báðu um að svæðið í nágrenni við skálann yrði kannað þar sem sést hafði neyðarsól á lofti. Nillarnir voru ræstir og gekk vel að græja sig upp og eftir 20 mínútur voru allir komnir út og hófu leit. Skyndilega sást neyðarsól á lofti og skömmu síðar var tendrað á neyðarblysi og gátu nillarnir tekið stefnuna á það. Skömmu síðar fundust svo "villtu
rjúpnaskytturnar" ómeiddar en kaldar. Á sunnudeginum var svo gengið að Hafrafelli og mikið var Eystri-Rangá köld. Um kvöldið hittist svo hópurinn á 67 og voru allir ánægðir með helgina.

-Matti Zig

Stefnan tekin í skálann

Hópurinn galvaskur að baki læriföður sínum

Arnaldur gáir til sauða sinna

Margir eiga sagga-fínar minningar úr gamla Tindfjallaseli

Fátt jafnast á við góðan skammt af pulsum og baunum með sméri

 
Sigurvegari rötunarkeppninnar fékk veglegan og viðeigandi vinning

Slegið var upp afmælishófi fyrir meistara Stefán

Og haldiði að nillarnir hafi ekki bakað köku fyrir læriföður sinn

Afmælisbarnið kátt með sitt

Bívakað á bretabretti

Gengið yfir Rangá á heimleið

Smá straumvatnsbjörgunarþjálfun í leiðinni

Danni driver

Sex fræknir og frískir stokkvarar Anna lára, Atli, Heiða, Maggi Zig, Matti og og að sjálfsögðu Snorri.  Smelltu sér í stökkgallan, reifuðu á sig ryggin og héldu upp í vél fimmtudaginn 13.oktober  Með voru tveir tilvonandi stökkvarar Guðgeir og Daníel.

Farið var með fokker 50 vél Landhelgisgæslunnar frá flugvellinum í Vatnsmýrinni.  Stefnan var sett á 8000 fet en í 8000 fetunum reyndist of mikill þrýstingur svo ekki var hægt að opna vélina. Flugið var þá lækkað í 5500 fet,  í þeirri hæð yfir Sandskeiði var ekkert annað hægt að en að þrusa sér út úr vélinni og fljúga um loftin blá í frábæru frjálsu falli.  Um það bil 2000 þúsund fetum neðar var kippt í spottann og fallhlífin opnuð. Við tók svo skemmtilegt flug á fallhlífinni sem endaði með lendingu og breiðu "Sólheimaglotti"  á Sandskeiðinu.

Heiða að æfa artsið

Anna Lára klár í slaginn

Kominn fiðringur í dömurnar

Karlarnir þykjast vera svalari

Maggi stálmús

Atli á síðustu mínútu fyrir brottför

Jumpmasterinn lentur og lítur eftir krílunum sínum

sem svífa niður eitt af öðru

Matti, Atli, Maggi, Heiða, Snorri og Anna Lára

Allir háloftaflubbarnir lentu semsagt sjúklega glaðir og ánægðir með stökkið!!   
Viljum við þakka Landhelgisgæslunni kærlega fyrir okkur

– Heiða