Hjólaferð FBSR verður farin helgina 29. – 31.ágúst. Á föstudagskvöld verður keyrt að skálanum við Sveinstind. Á laugardag verður hjólað um Blautulón meðfram Eldgjá og um jeppaslóða að Álftavötnum. Á sunnudeginum verður hjólað frá Álftavötnum um Strútslaug og endað við skálann Strút og þaðan verður haldið í bæinn.
Þessi ferð er jafnt fyrir inngengna sem nýliða og þarf fólk ekki að vera í brjáluðu hjólaformi þar sem að allur búnaður verður keyrður á milli.
Vinsamlegast tilkynnið þátttöku á spjallsíðu FBSR.
Útkall í Landmannalaugar 5. ágúst 2008
Af vefnum Landsbjorg.is. Á sjötta tug björgunarsveitamanna leituðu erlends ferðamanns við Landmannalaugar aðfararnótt laugardags. Mun maðurinn hafa farið í gönguferð frá tjaldsvæðinu og ætlaði hann að ganga svokallaðan Skallahring upp frá Laugum. Hann skilaði sér ekki til baka og var þá hafin leit. Maðurinn fannst heill á húfi rétt fyrir klukkan sjö um morguninn. Hann var kaldur og hrakinn en vel á sig kominn að öðru leyti. Farið var með hann í skála í Landmannalaugum.
Básagæsla
Það vantar 10 manns fyrir næstu helgi, Verslunarmannahelgina, í Bása. Því fleiri sem eru þeim mun minna er að gera.
Endilega taka bara fjölskylduna með, hún getur þá farið í göngutúr eða skemmt sér á meðan flubbinn sinnir sínu.
Brottför á föstudag fer eftir hvenær fólk er laust úr vinnu og þess háttar.
Sendið póst á [email protected] til að tilkynna þátttöku.
kv. Stefán Þ.
Útkall í Keflavík
Sunnudaginn 27.júlí var FBSR kölluð út vegna hættuástands á Keflavíkurflugvelli. Var útkallið afturkallað örfáum mínutum eftir boðun en þá hafði flugvélin lent heil á höldnu með gangtruflanir í hreyfli.
Útkall í Esjuna 24.júlí 2008
Flugbjörgunarsveitin var kölluð út í gær vegna tilkynningar um nakinn mann í hlíðum Esju. Sést hafði til mannsins um hádegið og voru björgunarsveitir kallaðar út skömmu síðar.
Voru hópar frá sveitinni að störfum frá hádegi og frammeftir nóttu en í undirbúningi var að koma ferskum fótum á fjallið þegar maðurinn fannst í dag, föstudag.
Útkall í Keflavík
Fimmtudaginn 10. júlí var Flugbjörgunarsveitin kölluð út vegna hættuástands á Keflavíkurvelli en þar var farþegaþota að koma inn til lendingar með dautt á einum af tveimur hreyflum.
Þrettán mínutur liðu frá útkalli að afturköllun en voru þá þrír bílar sveitarinnar að leggja af stað að söfnunarsvæðinu við Straumsvík.
Varðbergsflugi frestað
Varðbergsflug sem halda átti í í dag vegna skútunnar sem saknað er fyrir sunnan landið var frestað til miðvikudags vegna veðurskilyrða.
Útkall í Esjuna 7.júlí 2008
Í kvöld fór sveitin í útkall Esju vegna manneskju sem þar hafði brotnað á fæti. Ekki kom þó til aðgerða af hálfu bjögunarsveita þar sem þyrla Landhelgisgæslunnar var á æfingaflugi í Hvalfirði og sótti sjúklinginn.
Leit að manni 7.júlí 2008
Í dag var sveitin kölluð út vegna alsheimer sjúklings sem hvarf frá heimili sínu í morgun. Maðurinn fannst í eftirmiðdaginn heill á húfi.
Varðbergsflug vegna kanadísks báts
Miðvikudaginn 2. júlí var sveitin kölluð út vegna neyðarskeytis frá frífljótandi neyðarbauju u.þ.b. 330 sjómílur suðsuðvestan frá Reykjanesi. Baujan er skráð á fiskibát sem er skráður í Kanada.
4 félagar Flugbjörgunarsveitarinnar í Reykjavík tóku þátt í leitinni en hér að neðan eru myndir frá fluginu.
Guðgeir og Ottó á leiðinni á leitarsvæðið.
Guðgeir, Pétur og starfsmaður LHG.
Pétur að störfum.