Um hádegisbil annars desember var kallað út á hæsta forgangi, Forgangur 1 – Rauður, vegna tveggja stúlkna sem lent höfðu í sjálfheldu í felli austan við Hafravatn. Um var að ræða hóp unglinga sem höfðu verið á gangi þegar
tvær stúlkur misstu fótanna og runnu fram af fellinu. Þar sátu þær í
sjálfheldu.

Beðið var sérstaklega um fjallbjörgunarmenn. Svo heppilega vildi til að
nægur mannskapur var í húsi hjá okkur enda undirbúningur fyrir
jólatrjáasölu að hefjast.Viðbragstíminn var því afar stuttur. Þegar okkar menn voru á leið að Hafravatni tóku þeir eftir fólki á gangi í nágrenninu nokkuð frá slysstaðnum. 

Þegar aðgerðir voru ný hafnar við að koma stúlkunum tveimur niður kom í ljós að hluti af hópnum hafði villst og var undirbúið að hefja leit að þeim. Okkar menn tilkynntu þá að þeir hefðu séð fyrrgreint fólk á gangi á svæðinu. Sexhjól var sent þangað sem fólkið hafði sést og kom þá í ljós að það voru ungmennin sem höfðu villst af leið og var þeim komið til bjargar. Björgun stúlknanna tveggja úr sjálfheldunni gekk einnig giftusamlega.

Laust eftir miðnætti aðfararnótt mánudagsins 27. nóvember var sérhæfður leitarhópur kallaður til leitar að kajakræðara sem saknað var. Hann hafði haldið til róðrar í Hvalfirði þá fyrr um daginn en ekki skilað sér.

Leitarhópum var stefnt í Hvammsvík þar sem leit átti að hefjast. Stuttu eftir komuna þangað fann þyrla Landhelgisgæslunnar bátinn og stuttu seinna manninn sem þá var látinn.

Að venju sendir Flugbjörgunarsveitin nokkra félaga á árlegt námskeið í snjóflóðabjörgun og stjórnun aðgerða í Finse í Noregi. Að þessu sinni er það haldið 3. til 11. mars næstkomandi. Það geta fimm farið út og nú þegar eru tvö sæti úthlutuð.  

Umsækjendur þurfa að vera í það minnsta slarkfærir í norðurlandatungumálum og á skíðum, en námskeiðið er á norsku og hluti af verklegu kennslunni fer fram á skíðum.

Námskeiðið er á vegum Norska Rauða krossins og innifalið er matur og gisting. Flugbjörgunarsveitin og SL veita styrk  fyrir flugfargjald og lestarmiða. Skila þarf inn skýrslu um ferðina.

Umsóknum skal skila til gjaldkeri <hjá> fbsr. is.  

Upplýsingar um námskeiðið: www.redcross.no/finsekursene 
Upplýsingar og myndir af svæðinu: www.finse.com

Rétt fyrir klukkan níu að morgni þriðjudagsins síðastliðins var kallað út til leitar að eldri manni sem var saknað. Hann hafði síðast sést um kl. 22 kvöldið áður og óttast var um afdrif hans.

Grunur lék á að hann hefði farið eitthvert á bílnum sínum og var því beitt slóðaleit. Fjórir menn á tveimur bílum frá okkur fóru til leitar á slóðum í kringum borgarsvæðið. Maðurinn kom svo í leitirnar af sjálfsdáðum stuttu eftir að leitin hófst.

Símon og Steinar á FBSR-5 í Nýliðaferð 4×4

Símon og ég skelltum okkur í nýliðaferð Ferðaklúbbsins 4×4 á splúnkunýja patrólnum, FBSR-5. Við vorum smá smeykir að fara í svona ferð á algjörlega óreyndum bíl, en þær áhyggjur voru óþarfar því bíllinn reyndist frábær. Það var ekkert út á hann að setja eftir þessa ferð.

Hópurinn hittist á ónefndri bensínstöð hér við bæjarmörkin, alls 11 bílar, allir sæmilega búnir, nokkrir 44" og nokkrir 38". Þaðan var keyrt inn í Hrauneyjar, þar sem þeir sem höfðu ekki jafn marga aukatanka og við þurftu að tanka, s.s. allir aðrir. Eftir ágætis hamborgara á línuna var haldið inn í Jökulheima. Færið var grjóthart, enda var bara grjót og einstaka klakaskafl í veginum alla leið inn í Jökulheima. Í Jökulheimum var gist í þeim tveimur ágætu skálum sem þar eru. Á laugardagsmorgni var ræs um átta og brottför á slaginu níu í gaddafrosti, tæpar tuttugu gráður ef ég man rétt og fóru bílar misauðveldlega í gang við þær aðstæður. Allir komust þó af stað og upp á jökul í leit að snjó. Færið var hart uppi á jökli og brunuðum við því áfram, þar til einn bíllinn varð eitthvað móður í kuldanum og missti allt afl. Bíllinn var því skilinn eftir en mannskapnum hent í annan bíl og brunað upp á Grímsfjall. Stoppið var ekki langt á Grímsfjalli, enda -29°C, allir röltu þó um og dáðust að útsýninu. Eftir Grímsfjall renndum við jeppunum niður austurhlíðina og í sveig niður á Grímsvötn að virða fyrir sér gíginn og 30 stiga frostið sem þar var. Ég held ég geti fullyrt það að enginn í hópnum hafi áður upplifað jafn mikinn kulda. Það merkilega var samt að vegna þess hve mikið blankalogn var þarna, var í góðu lagi að vera á peysunni einni (eða tveim, þrem). Frá Grímsfjalli var ekið beinustu leið upp á Þórðarhyrnu og brölt upp á hana á broddum eða í sporunum sem Símon hjó með brunamannaöxinni. Ég ætla nú ekki að reyna að lýsa útsýninu þaðan. Þaðan var ekið, með stuttri viðkomu hjá Pálsfjalli, heim í skála og dýrindis grill. Fólk lá svo á meltunni fram eftir kvöldi og spjallaði um dekk, smurolíur og drif.

Þetta var s.s. alveg ljómandi ferð í frábæru veðri, en engum snjó. Þ.e.a.s. ekki fyrr en við komum í bæinn. Í bænum var eins og margir kannast við ófært um allt og ófærðarútkall í gangi.

Takk fyrir ferðina,

Steinar Sig.

Hér eru svo nokkrar myndir

Nú um helgina 24. til 26. nóvember stefna bílahópar björgunarsveita á svæði 1 upp á hálendið
í stóra reisu. Tilgangurinn, auk þess að hafa gaman að, er að þjappa
hópunum meira saman og auka samstarfið. Farið verður í Veiðivötn á
föstudagskvöldið og síðan tekinn stór og góður hringur um helgina.
 

Bílahópar HSSR, HSSG og HSSK munu fara með okkur í þessari ferð. Þessa
stundina er verið að fletta í sundur kortunum og ákveða nánar rúntinn
sem á að taka en í öllu falli er markmiðið að gera þetta að
skemmtilegri og krefjandi ferð þannig að menn fái sem mest út úr
henni. 

Skráning og allar nánari upplýsingar eru hjá Ásgeiri í síma 861 2998 

Það
fór ekki framhjá neinum að aðfararnótt sunnudags reið einn mesti
snjóbylur um árabil yfir Suðvesturlandið. Hér í Reykjavík voru
björgunarsveitir kallaðar út og bílahópur FBSR var á ferðinni um borg
og bý til að aðstoða fólk við að komast leiðar sinnar.  

Fimm manns voru á vaktinni á tveimur bílum frá klukkan sex um
morguninn til um klukkan 17  í gær, sunnudag.  Verkefnin
fólust aðallega í að kippa í bíla sem sátu fastir og að ferja
starfsfólk á heilbrigðisstofnunum til og frá vinnu. Verkefnin tókust í
alla staði ljómandi vel.

Nú í lok mánaðarins mun svæðisstjórn ásamt tæknideild lögreglunnar í Reykjavík
standa fyrir fyrirlestri um aðkomu og umgengni á vettvangi þar sem slys eða
andlát hefur orðið.

Hvað er það sem við þurfum að athuga til að spilla ekki
vettvangi, hvernig berum við okkur að, innanbæjar sem og utanbæjar þar sem langt
er í rannsóknaraðila. Mjög mikilvægt getur verið að vita nákvæmlega hvað var
gert á staðnum, hverjir fóru inn á vettvanginn, setja upp innri og ytri lokanir
o.þ.h.. þessi fyrirlestur er sérstaklega hugsaður fyrir svæðisstjórn, sérhæfða
leitarhópa á svæðinu og hópstjóra en allir sem hafa áhuga eru velkomnir.

Fyrirlesturinn verður haldinn í húsi FBSR miðvikudagskvöldið 29 nóvember kl 20.00

Breytingar á húsnæðinu eru núna að komast á lokastig. Búið er að
parketleggja og ganga frá milliveggjum, Hillur undir útkallsbúnað eru
komnar upp, félagsaðstaðan og stjórnarhergi nánast full frá genginn.
Áfram mætti telja en myndir segja meira en þúsund orð.

Nýja aðstaðan verður líklegast full kláruð eftir 1-2 vikur. Eins og
myndirnar bera með sér er ennþá allt á rúi og stúi en engu að síður er
þegar byrjað að koma tækjum og búnaði fyrir á  þeim stað sem hann
á að vera.

Byrjað er að setja upp skápa fyrir einstaklingsbúnað á milliloftinu í
syðri endanum. Eins og sjá má eru þeir rúmgóðir, enda Frímann ekki með
styttri mönnum. 100 cm á breidd, 200 á hæð og 60 á dýpt (þ.e.a.s.
skápurinn – ekki Frímann).  Í fyrsta áfanga verða aðeins 20 skápar
en þeim verður fjölgað fljótlega.

Stiginn var færður og útkallsbúnaður verður hafður þar sem vélsleðarnir voru áður. Þessi högun mun stytta viðbragðstíma.

Í norðurendanum er félagsaðstaðan komin vel á veg.  Hér er
eldhúskrókurinn en í hann vantar nú aðeins ísskápinn og uppþvottavélina.

Rafvirkinn Atli sér um að koma ljósi á aðstöðuna, enda átti að nota hana fyrir fund fjallahóps.

Gömlu sófasettin voru flutt upp fyrir fundinn. Fjallahópur búinn að koma sér vel fyrir í þeim og fundur hafinn.

Farið yfir búnaðarmál. Í baksýn er stóri glugginn sem vísar yfir í bílasalinn.

Inni í nýja stjórnarherberginu, sem er inn af félagsaðstöðunni.

Fallhlífahópur að koma sér fyrir í sinni aðstöðu, sem áður var undanfaraherbergið.