Helgina 30-1. apríl skellti snjóbílahópur sér í Bláfjöll með tryllitækið sitt. Mikil vinna hafði verið lögð í bílinn síðustu vikur, aukatankar höfðu verið festir á og fleira. Það var því spennandi að sjá hvernig breytingarnar reyndust.

 Á laugardag skutlaði Magnús Þór bílnum upp eftir og Steinar og Gulli B1 rúntuðu um fram yfir hádegi þegar Einar Hjörleifs tók við af Gulla. Skyggni var ekkert eins og sést á myndum, þannig að við fórum ekki mjög langt þann daginn. Á sunnudaginn var öllu skaplegra veður, sól og bjartviðri. Því treystum við, Steinar, Einar og Halldór, okkur lengra inn í fjalllendið og náðum nokkrum góðum skíðaferðum. Ekki slæmt það.

Halli kom seinnipartinn, þegar Einar og Halldór fóru heim og tók í bílinn. Þá fór reyndar allt aðeins að klikka, bíllinn ofhitnaði aðeins og glussaslanga gaf sig. Við fórum því stystu leið niður á sjöu. Það varð reyndar stuttur bíltúr, því við vorum rétt lagðir af stað í bæinn þegar við rákumst augun í vélsleða úti í miðju krapalóni. Að sjálfsögðu stóðum við ekki hjá, heldur tókum aftur af og sóttum bílinn. Það kostaði okkur reyndar all nokkuð krapasull og vesen, en gekk allt giftusamlega að lokum.

Núna um páskana verður farið í Skaftafell þar sem menn og konur geta leikið lausum hala. Eins og menn vita þá er í Skaftafelli ógrynni af tindum og miserfiðum leiðum.  Veðurspáin er þannig að næturnar eru blautar og laugardagurinn allur rennandi en aðra daga má búast við smávægilegum skúrum, sem tekur varla að tala um.

Einhverjir hafa nú þegar ákveðið að fara á Hnappavelli og er það vel. Ekki verða ákveðnir brottfaratímar heldur treyst á að þeir sem hafi áhuga á að fara tali sig saman og komi sér á staðinn. Ef menn þurfa að nota bíla sveitarinnar þá þarf að sjálfsögðu að tala við Símon um það.

Það er snjór og topp skíðafæri í Bláfjöllum, ef það hefur farið fram hjá
ykkur. Í tilefni þess og að Leitner er í flottara ásigkomulagi en
nokkru sinni fyrr, með nýju aukatönkunum klárum, ætlum við með hann upp
í Bláfjöll í æfingar. Allir velkomnir með!

Við förum upp eftir fyrripartinn á laugardag og
hann verður þar uppfrá fram á seinnipart sunnudags.

Allir sem vilja eru velkomnir upp eftir, hvort sem þeir eru
þroskaðir dísilmaurar sem geta miðlað þekkingu sinni, ungir og
óharðnaðir nýliðar, virkir snjóbílamenn eða bara einhverjir sem vilja
húkka far upp góða skíðalínu.

Það er hægt að vera með hluta úr degi, dag eða alla helgina. Við viljum bara sjá sem flesta.

Látið vita ef þið viljið far með strumpastrætó á laugardaginn.

Snjókveðjur frá snjóbílahóp!

Aðfararnótt sunnudagsins 11. mars var kallað eftir aðstoð við leit að þremur vélsleðamönnum sem saknað var. Leitað var á svæðinu frá Lyngdalsheiði að Langjökli. Víðtæk leit hafði þá staðið yfir hjá björgunarsveitum á svæðinu og var kallað eftir liðsauka. 

Beðið var um alla tiltæka vélsleða og jeppa á 44 tommu dekkjum en veðrið á svæðinu var afar slæmt með miklu roki og snjóbyl.  Alls voru 43 hópar frá 23 björgunarsveitum við leit í þessu útkalli. Einn 44 tommu jeppi og þrír vélsleðar fóru frá okkur ásamt áhöfn.

Vélsleðamennirnir fundust svo undir morgun við Skjaldbreið heilir á húfi. Einn sleðinn hafði bilað og veður var algjörlega afleitt. Þeir brugðust hárrétt við, bjuggu til skjól úr sleðunum og létu þar fyrir berast. Þeir voru með NMT síma en voru svo óheppnir að eldingu hafði slegið niður í háspennulínur á milli Kolviðarhóls og Geitháls með þeim afleiðingum að ekkert NMT samband var á svæðinu. Því gátu þeir ekki látið vita af sér.

Ég bý í sveit, á sauðfé á beit
og sællegar kýr út á túni.
Sumarsól heit senn vermir nú reit
en samt má ég bíða eftir frúnni.
(Einbúinn – Magnús Eiríksson)
 

Loksins kom góð spá fyrir helgi í rauninni allt of góð vegna þess að það átti að vera HELLWEEKEND en sem "betur fer" var stjórnstöðvarbíllinn ekki kominn af verkstæðinu. Stefán hershöfðingi yfir B2 kom með þá hugmynd að fara uppí Tindfjöll og reyna við Tindinn.  Að venju var lagt af stað klukkan"19:00" og stefnt á KFC á Selfossi (eitthvað finnst manni að pylsan sé orðin útundan)

Eftir að hópurinn hafði hesthúsað nokkrum skíthoppurum var brunað upp að efsta skála í Tindfjöllum. Kapteinn Sigurgeir fór með sína harðkjarna nagla í Tindfjallasel og þegar honum var boðið far eftir að hann kom upp Sneiðinginn afþakkaði hann það og sagði "Það skal ekki spyrjast út að mínir nillar geta ekki gengið" Færið var mjög gott fyrir utan smá klaka kafla neðst í Sneiðingnum. Svo var slegið upp tjöldum og bívökum.

Spottaséníin vöknuðu kl 04:00 en þau sem ætluðu að nýta sér góðmennsku þeirra og fara á Tindinn á eftir þeim vöknuðu kl 05:15. Veðrið var frááábæært og sóttist ferðin að Tindinum nokkuð vel, að vísu töfðust spottaséníin aðeins þar sem þau ákváðu að kanna snjóþekjuna og fyrir vikið þurftu þau aðeins að breyta leiðinni. Þetta kom ekki að sök og eins og alltaf þá er allur varinn góður. Þegar kom að því að hotta liðinu upp á Tindinn þá kom í ljós að ekki voru allir tilbúir til að leggja í hann. Þá tók undirritaður sig til og bauðst til að leiða ferð á Hornklofa, Ýmir, Ýmu, Saxa og Haka. Undir kvöld var orðið það hvasst að ekki var stætt í hlíðum Saxa og eftir að hafa klárað tröllin tvö var þetta látið gott heita og stefnan tekin á tjöldin.

Þegar við komum að tjöldunum sáum við að Kári hafði tekið sinn toll, eitt tjald orðið flatt og brotin súla í því. Um nóttina bætti heldur í vind og á tímabili bjóst undirritaður alllt eins við því að fjúka af stað, þvílíkt var rokið. Á sunnudeginum æfðu B2 ísaxarbremsu og leitartækni á meðan Sigurgeir og naglarnir hans toppuðu að ég held flest sem var hægt að topp þarna. Svo var farið í pizzu á Hvolsvelli og síðan í bæinn. Allir mjög ánægðir með þessa ferð og mætingin var með ólíkindum. 20 manns og þar af 10 inngengnir.

Texti: Matti Zig
Myndir: Ragna Ráðagóða 

Laust fyrir klukkan fimm  í dag barst útkall vegna Fokker Friendship flugvélar. Vélin var að koma inn til lendingar á Reykjavíkurflugvelli með 26 manns um borð. Óttast var að nefhjól vélarinnar hefði ekki farið niður og var þá strax sett í gang viðbragðsáætlun.

Þegar vélin nálgaðist flugvöllin kom í ljós að
óttinn var ástæðulaus. Öll hjól vélarinnar voru í lendingarstöðu og í
fullkomnu lagi. Þá höfðu aðeins liðið 10 mín. frá því að kallað var út.
Vélin lenti án nokkurra vandkvæða og var útkallið afturkallað áður en
björgunarmenn komust úr húsi.

Árshátíð FBSR verður haldin 3 mars nk. í sal Fóstbræðra við Langholtsveg. Húsið opnar kl. 19. Miðaverð kr. 3.000.

Landsæfingu SL verður að þessu sinni skipt í tvo hluta annars vegar á landi og hins vegar á sjó. Landæfingin verður laugardaginn 24.mars á Skógum undir Eyjafjöllum. Á landæfingunni verður boðið upp á verkefni m.a. fyrir; sjúkrahópa,
leitarhópa, undanfara, rústahópa, bílahópa, sleðahópa, snjóbíla.
Landslagið hefur upp á mikið að bjóða og verður það nýtt til hins
ýtrasta. 

Á báðum æfingunum verður boðið upp á gistingu aðfaranótt laugardags og sunnudags. Einnig verður boðið í sund að æfingum loknum og sameiginlegrar matarveislu.

Búið er að opna fyrir skráningu og mikilvægt að skráning hópa sé rétt og tímalega þannig að hægt verði að útbúa verkefnin í takt við þátttöku. Það sem þarf að koma fram í skráningu er; frá hvaða sveit, hvað margir ætla að taka þátt, hvað mörg tæki og hvernig tæki. Einnig þarf að koma fram hvernig verkefni hóparnir vlija takast á við en ef hópar eru ekki með sérhæfingu verður þeim úthlutað verkefnum sem allt björgunarsveitarfólk getur leyst.

Skráning er á [email protected] eða í síma 570 5900. Minnum alla sem ætla að mæta á þessa viðburði að skrá sig á heimasíðunni undir" Á döfinni", á netfangið [email protected] eða í síma 570-5900. Ef einstaklinga vantar gistingu þá hefur félagið tekið frá herbergi á Grand hóteli. Þeir sem vilja nýta sér hana eru beðnir um að láta Sigrúnu vita í síma 570-5908 eða á netfangið [email protected]. Ef þig vantar frekari upplýsingar um æfinguna, aðstöðu eða þ.h. getur þú haft samband í [email protected]