Búið er að setja WFR námskeiðið inná skoli.landsbjorg.is þannig að þeir sem ætla að mæta, vinsamlegast skráið ykkur þar sem fyrst.
Greinasafn eftir: stjorn
Ráðstefna um neyðar- og öryggisfjarskipti
Ráðstefna um neyðar- og öryggisfjarskipti verður haldin á Hótel Loftleiðum föstudaginn 14. mars. Björn Bjarnason, dóms- og kirkjumálaráðherra setur ráðstefnuna en á henni verður fluttur fjöldi áhugaverðra erinda, vinnuhópar starfræktir og lýkur ráðstefnunni með umræðum.
Í lok ráðstefnunnar verður boðið upp á léttar veitingar. Ráðstefnustjóri er Róbert Marshall. Aðgangur er ókeypis og opinn öllum félögum.
Nánari upplýsingar um ráðstefnuna er að finna hér.
Páskaferð
Minnum á umræður um páskaferðina inná spjallinu! Syttist í þetta.
Dagskráin birtist ekki
Eins og glöggir notendur hafa tekið eftir er ekki hægt að skoða alla dagskrána heldur eingöngu 5 næstu liði hér hægra megin á síðunni. Ástæðan er "hakk" sem einhverjir óprútnir aðilar komu fyrir á svæðinu okkar til að "phis-a" banka á Hawaii. Búið er að loka fyrir svikasíðuna og verið er að uppfæra og breyta síðunni til að gera óprúttnum erfiðara fyrir næst.
Mummi í fallhlífanámi
Guðmundur Ásgeirsson, eða Mummi eins og við þekkjum hann best, er þessa dagana staddur í Skydive City í Flórída til að nema fallhlífastökk. Hann hyggst taka þar stökkstjóraréttindi og jafnvel USPA-B réttindi ef vel gengur. Reynslan og menntunin sem hann aflar sér mun koma sveitinni vel til góða.
Skydive City er gælunafn á bænum Zephyrhills í Flórída sem er af mörgum talinn vera eitt besta fallhlífastökksvæði í heiminum. Þangað kemur fólk hvaðanæva að til að mennta sig í fallhlífastökki.
Mummi segir aðstæður vera hinar allra bestu sem hann hefði getað hugsað sér og hann vonast til að vera kominn með 120-150 stökk þegar hann kemur til baka í apríl eftir þriggja mánaða dvöl. Kennarar og starfsfólk eru með mikla reynslu og einstaklega vingjarnlegt og hjálpsamt.
Það er akkur fyrir sveitina að fá nýjan stökkstjóra í hópinn og við hlökkum til að fá kappann heim.
Mummi heldur úti bloggsíðu þar sem fylgjast má með framgangi hans og skoða myndir. Slóðin er http://www.blogcentral.is/murmull.
Eitt af verkefnum Mumma er að læra næturstökk. Hér sést línan sem notuð er í lendingunni.
Árshátíð
Árshátíðin verður glæsileg að vanda en að þessu sinni verður húnhaldin þann 1. mars í sal Skútunnar, í Hafnafirði.
Gamanið hefst kl 19:00 með fordrykk. Boðið verður upp á þriggja rétta máltíð með víni og verður veislustjórar kvöldsins okkar eigin Erna og Guðgeir. Skemmtiatriði verða meðal annars í boði nýliðahópanna og eftir matinn mun hljómsveitin Blúndubandið leika fyrir dansi
Leit haldið áfram
Leit að Piper Cherokee flugvélinni sem saknað hefur verið síðan í gær var haldið áfram í morgun. Félagar sveitarinnar manna varðberg um borð í TF-SYN, Fokker flugvél Landhelgisgæslunnar.
Varðbergsflug vegna Piper PA28
Skömmu fyrir hádegi fimmtudaginn 21.febrúar var sveitin kölluð út vegna leitar að Piper PA28 eins hreyfils flugvél sem horfið hafði af radar skömmu áður. Fjórir félagar úr sveitinni fóru í loftið með Fokkervél LHG um klukkan 12:30.
Útkikk vegna Cessnu
Sveitin var kölluð út í morgun til að manna varðbergsvakt á TF-SYN. Leit stendur yfir að Cessnu-310 vél sem fór í hafið um 50 sjómílur vestur af Reykjanesi. Fjórir félagar FBSR sátu vaktina.
Verið var að ferja flugvélina frá Bandaríkjunum til Bretlands en flugmaðurinn hafði gist á Grænlandi og ætlaði að stoppa í Reykjavík á leið sinni til Bretlands.
Wilderness First Responder
Ertu Flubbi og hefur þú áhuga á WFR námskeiði? Ef áhugi reynist nægur þá ætlum við að fá námskeið hjá Björgunarskólanum sérsniðið handa okkur í mars/apríl. Sendu póst á ritara ef þú vilt vera með.