Nýliðaferð í Tindfjöll í rigningu og sudda 

Það er fastur liður í þjálfunarferli hvers nýliða að fara í Tindfjöll oftar en einu sinni. Í febrúarlok fóru báðir nýliðahóparnir þangað saman. B1 (fyrra ár) gróf snjóhús til að gista í en B2 (seinna ár) freistuðu þess að komast á Ými og Ýmu, tinda Tindfjallajökuls.

Ekki tókst það verkefni hjá B2 en í staðinn var æfð rötun í 10 m. skyggni og tókst sú æfing með ágætum en eðli málsins samkvæmt eru ekki til myndir af því.

Svo var kvöldinu eytt í át og í verkefni sem miðaði að því að koma hitanum í Ísalp skálanum í 20°C með aðstoð MSR bensín prímusa og annarra gas prímusa. Það var ekkert vit í því að nota kamínuna því kofinn fylltist bara af reyk við það.

Á sunnudeginum var svo plammpað á skíðum í krapa og vatnselg. Ekki var hægt að skíða alla leið niður þannig að skíðin vöru öxluð fyrir ofan sneiðinginn. Svo var komið við hjá Gallerí pizza á Hvolsvelli og hlaðborðinu þar gerð góð skil og eins og ein myndin ber með sér eru sumir alltaf tilbúnir ef sólin skyldi brjótast fram.

B2 hópurinn ásamt Diablo sjálfum (í miðjunni)

Veislufæði

Ekki svo mikið veislufæði

Viðar hélt sýningu á sumarlínunni á Gallery Pizza á Hvolsvelli

B1 og B2 héldu í Skarðsheiði laugardaginn 11. febrúar og hugðust
spreyta sig á vetrafjallamennsku 1 og 2. Spáin gerði ráð fyrir hæglætis
veðri fram eftir degi en svo átti að þykkna upp. Auðvitað gekk það
eftir. Aðstæður fyrir hópana voru samt góðar. Bjarni Nikolai og Maggi
Stálmús kenndu B1 undirstöðuatriðin á meðan Atli, Diablo, Steinar og
Óli fóru með B2 á Skessuhorn.

Ferðin upp á Skessuna gekk sæmilega og allir voru sáttir að ná
tindinum þó ekkert væri skyggnið. Á leiðinni niður var þreytan farin að
segja til sín og eflaust hafði það eitthvað með það að gera þegar
Diablo missti jafnvægið og rann stjórnlaust niður bratta
harðfennisbrekku og í fátinu missti hann öxina sína. Þegar hann þaut
framhjá nýliðunum sínum hugsaði hann "þau hljóta að stoppa mig". Það
var einmitt það sem gerðist. Mía litla og Ragna brugðust við alveg eins
og þeim hafði verið kennt ári áður, fleygðu sér niður, gjörsamlega
grófu axir sínar í harðfennið og skeyttu engu um steinana sem urðu á
vegi þeirra fyrir neðan. Stelpurnar eiga því hrós skilið fyrir þessi
viðbrögð!

Eftir þetta sigum við niður bröttustu kaflana og slógum svo upp
tjöldum í 640 metra hæð. Þar áttum við ágætis dvöl í roki og
skafrenningi. Daginn eftir var ræst klukkan 9 og arkað til móst við
bílana sem voru komnir að sækja okkur.

Mía er á svipinn eins og hún kunni ekkert á þetta verkfæri en allt annað átti
eftir að koma í ljós!

Maggi stálmús og Atli ofurhugi

B-hóparnir ásamt þjálfurum

F.v. Óli, Atli, Steinar, Viðar, Evvi

Ragna og Sóley (Mía)

Diablo kuldalegur

Um hálf fjögur leytið barst ósk um að undanfarar gerðu sig klára í þyrlu. Bíll hafði fallið ofan í sprungu í Hofsjökli. Varnarliðsþyrlurnar höfðu þá verið sendar af stað, ásamt einni þyrlu af dönsku herskipi sem stödd var við landið.

Undanfararnir voru beðnir um að bíða klárir ef þyrla Landhelgisgæslunnar færi í loftið og yrðu þeir þá sendir með henni. Hlutverk þeirra yrði að fylgja lækni, vera honum innan handar og sjá til þess að hann kæmist ofan í sprunguna ef með þyrfti. Það fór svo að þyrlan fór aldrei af stað þar sem björgunarlið sem fyrst var sent á slysstað gat valdið verkefninu án frekari aðstoðar.

Rétt eftir klukkan 18 barst útkall frá Svæðisstjórn þar sem beðið var um jeppa og snjóbíla til að fara á staðinn og fóru frá okkur 9 menn á tveimur jeppum. Þeir voru ýmist í verkefnum eða á bið við stjórnsstöð í Hrauneyjum og komu aftur til Reykjavíkur um klukkan 2:30 í nótt.

Eins og fram hefur komið í fréttum þá lést annar þeirra sem í bílnum voru og hinn liggur nú þungt haldinn á spítala. Viljum við í Flugbjörgunarsveitinni votta þeim sem um sárt eiga að binda samúð okkar.

Meðfylgjandi mynd er úr myndasafni og er ekki af slysstað.

Afmælishátíð Flugbjörgunarsveitarinnar var haldin í Skíðaskálanum í
Hveradölum þann 18. febrúar 2006. Þrátt fyrir að vera dálítið seint á
ferðinni heppnaðist hún með miklum ágætum og um 70 gestir nutu góðs
matar, skemmtiatriða og síðast en ekki síst góðs félagsskapar. Í lokin
var svo slegið upp balli og Sælusveitin sá um fjörið.

Samkvæmt venjunni á stórafmælum voru veittar orður til þeirra
félagsmanna sem starfað hafa um árafjöld í Flugbjörgunarsveitinni. Þeir
sem hlutu að þessu sinni brons orður voru Ásmundur R. Ívarsson,
Bergsteinn Harðarson, Frímann Andrésson, Gérard Chinotti, Heiða B.
Ingadóttir, Jón Sigfússon, Jón Þorgrímsson, Magnús Andrésson, Magnús
Sigurðsson, Ottó E.Guðjónsson og Óli Haukur Ólafsson.

Þeir sem hlutu silfur orður voru Eðvarð Williamsson, Freyr
Bjartmarz, Grétar Pálsson, Guðmundur Gunnarsson, Jónas Guðmundsson,
Magnús Þór Karlsson, Ólafur Þór Júlíusson, Pétur Kristjánsson, Sigurður
Sigurðsson, Vilberg Sigurjónsson, Þór Kjartansson, Þórarinn Ólafsson og
Þráinn V. Þórsson

Gull orður hlutu að þessu sinni Snorri Hrafnkelsson, Grétar F. Felixson, Jón Gunnarsson og Kristjáns Eyfjörð.

Myndirnar hér að neðan tók Jón Svavarsson

Fullt nafn: Ásgeir Sigurðsson   

Gælunafn: Geiri Pitt

Aldur: 27

Gekk inn í sveitina árið: 2001

Atvinna/nám: Bifvélavirki/sveinspróf í bifvélavirkjun

Fjölskylduhagir: Giftur og á einn skæruliða

Gæludýr: 3 fiskar

Hópastarf og annað starf innan sveitarinnar: Bílahópur/ Flokkstjóri tækjaflokks

Áhugamál: Útivera, jeppamennska,

Uppáhalds staður á landinu: Vestmannaeyjar, sérstaklega um mánaðarmótin júlí-ágúst

Uppáhalds matur: Kalkúnn með feitri fyllingu

Ef þú ættir eina ósk, hver yrði hún? ég myndi óska mér fleiri óskir

Æðsta markmið: fjölga í fjölskyldunni og gera alltaf betur en ég hef gert.

Eftirminnilegasta augnablikið úr starfinu: Það er allt eftirminnilegt sem ég hef gert í starfinu.

Ásgeir á Land Rover jeppa sem hefur fengið að aka ófáa kílómetrana upp til
fjalla.

Hleypt úr á FBSR-2

Auðvitað nota menn hvert tækifæri sem gefst til að flagga því hvaða bíll er
bestur

Það er engin almennileg jeppaferð án tertu

Ásgeir og Arnar Bergmann

Sérhæfðir
leitarhópar voru kallaðir út í dag til að leita að dreng sem ekki hafði
skilað sér eftir skólasund. Um fimmtíu manns á svæði eitt
(höfuðborgarsvæðinu) tóku þátt í leitinni og þ.á.m einn bíll með sex
leitarmönnum frá Flugbjörgunarsveitinni. Ekki hafði leit staðið yfir í
langan tíma þegar viðkomandi kom fram heill á húfi.

Snjótroðara bjargað af Langjökli 

Fimmtudaginn fimmta janúar 2006 festist snjótroðari í krapapytti í
jökulrönd Langjökuls, skammt frá Jaka.  Beðið var um aðstoð við að losa hann og koma honum niður. Farið var á laugardeginum.

Magnús Þór og Guðgeir fóru með
snjóbílinn og Maggi Andrésar, Jón Sigfús, Danni og Halldór Magg fóru á
FBSR 4. Farið var úr bænum kl. 6:30 og keyrt upp að Jaka. Mikið hafði
snjóað sólarhringinn áður og stóð rétt svo pústið á snjótroðaranum upp
úr snjónum þegar að honum var komið. Seinna meir kom annar snjótroðari
á svæðið frá Heiðari í Varmahlíð. Snjóbíllinn og troðarinn sáu um að
ýta mesta snjónum frá, að ógleymdum ófáum skóflutökum hjá okkur og
mönnum frá Fjallamönnum hf.

Þegar búið var að moka vel frá bílnum sá átta hjóla MAN trukkur á
50" dekkjum frá Activity Group um að kippa í troðarann og losnaði hann
um tvö leytið. Eftir vel heppnaða björgun á troðaranum var tekinn smá
rúntur á FBSR 4 upp á hábungu Langjökuls.

Myndir og texti: Magnús Andrésson

Svona var aðkoman að troðaranum

Björgunarsveitarfólk hjá
Sirrý

21. desember 2005

Flugbjörgunarsveitinni hlaust sá heiður að vera í lokaþætti hinna vinsælu þáttaraðar Fólk með Sirrý, sem hefur gengið sleitulaust á Skjá einum um árabil. Tuttugu fulltrúar frá okkur mættu í sjónvarpssal til að spjalla við Sirrý, auk um tuttugu annarra gesta.

Spjallið snerist aðallega um hvernig það er að vera í björgunarsveit, við hverju megi búast í starfinu og af hverju fólk fórnar frítíma sínum í sjálfboðaliðastarf í almannaþágu. Eyrún Pétursdóttir og Jónas Guðmundsson sátu í sófanum hjá Sirrý og einnig talaði hún við fólk úti í sal. Jónas og Eyrún mættu svo með þrjá Troðna flugeldapakka. Nöfn viðstaddra gesta voru dregin úr potti og þau heppnu fengu fjölskyldupakkana að gjöf. Sirrý var sjálf með veglega gjöf sem var líka dregin út og það var enginn annar en Jón okkar Svavars sem var svo heppinn að fá þennan líka flotta dekurpakka frá Bláa lóninu með boddí lósjón og allt. Að auki fengu allir viðstaddir gestir miða í Bláa lónið.

Þetta var stórgaman, en við skulum ekki hafa fleiri orð um það heldur láta myndirnar tala sínu máli. Það var hinn heppni og hæfileikaríki félagi okkar Jón Svavarsson sem tók þessar myndir.

Skoða má þáttinn á vef Skjás eins með því að smella hér

Eyrún í förðun

Jónas og Addý ræða málin

Föngulegur flubbahópur af öllum kynslóðum var í salnum

Þá var komið að happdrættinu. Í vinning var auðvitað flugeldapakki

Ekki laust við að það sé nokkur svipur með þeim Addý og Sirrý